Skógareldar á frítíðaroynni Kos

Skógareldar herja í løtuni á kendu griksku frítíðaroynni Kos. Størstu eldarnir eru við býin Kardamena, har fleiri hundrað fólk, lokal eins væl og ferðafólk, eru flutt burtur til tryggari støð á oynni. 

Seint í gjárkvøldið bleiv sagt, at eldurin nærkaðist vegnum, sum knýtir Kardamena saman við altjóða flogvøllin á oynni, skamt frá turkiska meginlandinum.

Eisini á oynni Chios herja skógareldar í løtuni.

Tað hevur verið turt leingi, og tá tað so eisini er óvanliga nógvur vindur á leiðini, skapar tað umstøður, sum fleiri samanbera við eina svávuldós.

Fleiri enn 100 sløkkiliðsfólk stríðast móti eldunum á Kos og Chios, og tey fáa hjálp frá 11 flogførum og fimm tyrlum, sum stoyta vatn á skógareldarnar.

Tamarhald á eldunum

Í morgun skrivaði danska TV2, at ferðafólk hava fingið sms-boð um, at tamarhald er á skógareldunum, og at tað nú er trygt hjá teimum at fara aftur á gistingarhúsini, haðani tey vórðu flutt burtur í gjár.

Grikski forsætisráðharrin Kyriakos Mitsotakis sigur sambært Sky News, at roknast kann við fleiri skógareldum í summar, tí summarið hevur verið ógvuliga turt, samstundis sum tað er óvanliga nógvur vindur.

Í fjør kravdu skógareldar meir enn 20 mannalív í Grikkalandi, og nærum 20.000 fólk máttu rýma undan skógareldunum. Griksku myndugleikarnir sett fleiri fólk og styrkt tilbúgvingina í ár.