Noreg: 30 ár á varðhaldsstovn fyri grovan yvirgang

Ein søguligur dómur er sagdur í Oslo tingrætti í dag.

Zaniar Matapour er dømdur 30 ár á varðhaldsstovn/forvaring fyri grovan yvirgang, eftir hann skeyt frá hond undir Pride-vikuni í Noregi 25. juni í 2022.

Eisini er Matapour dømdur at rinda yvir 100 mió. norskar krónur í endurgjaldi til tey fleiri enn 300 fólkini, sum hava støðu sum órættað í málinum.

Dómarin legði dent á, at Matapour hevði verið atvold til stóra kropsliga og sálarliga pínu hjá teimum órættaðu. Dómarin helt eisini, at Matapour ikki vísti nakað tekin um samvitskubit.

Tvey fólk doyðu

Tvey fólk lótu lív, tá Matapour skeyt frá hond á tveimum skeinkistøðum miðskeiðis í Oslo, har serliga samkynd fólk eru.

Sambært NRK vóru níggju fólk særd av skotløstum, og fleiri enn 20 onnur fingu løstir av øðrum slag í ruðuleikanum, sum stóðst av skjótingini.

Dómurin í dag er tann strangasti, sum er sagdur í Noregi, og sum norsk lóg loyvir.

Verjin hjá Matapour, Marius Dietrichson, sigur við NRK, at hann mælir Matapour til at skjóta dómin inn fyri hægri rætt.