Ivasamt nær tað er klárt fara undir at screena føroyingar fyri tarmkrabba

Nu skulu føroyingar screenast fyri tarmkrabba. Tað segði løgmaður á ólavsøku.

Landssjúkrahúsið verður helst klárt at samskipa screening fyri tarmkrabba í heyst. Tað segði Aksel V. Johannesen, løgmaður, í sínari røðu, tá tingið var sett á ólavsøku. 

Men á Landssjúkrahúsinum tora tey ikki at lova, at so verður.

"Tað er ilt at siga, nær tað er klárt at fara í gongd," sigur Gunnvá Guttesen, varastjóri á Landssjúkrahúsinum við sjúkrarøktarfrøðiligari bakgrund. 

Finna sjúkuna fyrr

Ein arbeiðsbólkur fer undir at fyrireika screeningina í næstum. 

Fyrimunurin við at screena fyri tarmkrabba er, at mann finnur sjúkuna fyrr og sostatt fær eina betri viðgerð.

Í Krabbameinsætlanini frá 2022 vóru ynski um, at fleiri átøk skulu setast í verk. Teirra millum eru tvey tilmæli, sum vórðu send til Heilsumálaráðið um eina útgreiningar- og ávísingareind og eina screeningseind. Hesar eindir eru neyðugar, metir Landssjúkrahúsið, áðrenn tarmscreening kann setast í verk. Og pengar eru settir av til báðar eindirnar.