Fyrrverandi leiðari í SavnsGulli: "Kringvarpssavnið má gerast atkomuligt"

Á ólavsøku í fjør var komið á mál við at talgilda kringvarpssavnið.

Ein hálv millión pappírsskjøl, umleið 13.000 sjónbond og um 30.000 ljóðbond vóru talgildað. 

Harvið hevði SavnsGull-verkætlanin, ið var sett í verðina fyri at bjarga kringvarpssavinum, nátt sínum høvuðsendamáli. 

Má gerast atkomuligt

Fyrrverandi leiðari fyri SavnsGulli, Mass Hoydal, heldur, at nú má kringvarpssavnið eisini gerast atkomuligt fyri øllum føroyingum. 

Í lesarabrævi harmast hann um, at hetta arbeiðið tíverri ikki er byrjað enn. Fyri Mass Hoydal snýr hetta seg um tjóðarbygging. 

"Tað er av stórum týdningi, at vit taka okkum sum føroyingar í álvara," staðfestir hann. 

Mass Hoydal heitir á Kringvarpið og myndugleikarnar um at fáa gongd á arbeiðið við at gera savnið atkomuligt fyri fólki.

Ein fýra ára-ætlan fyri, hvussu hetta skal gerast, er gjørd. Nú snýr tað seg um viljan at fremja hana í verki, sigur fyrrverandi leiðarin í SavnsGulli. 

SavnsGull, Mass Hoydal