Føroysk skip fiska makrel í altjóða sjógvi norðanfyri

Føroysku skipini, sum fiska makrel, eru nú í altjóða sjógvi norðanfyri.

Eingin hevur søkt um loyvi enn at sleppa í norskan sjógv eftir makreli, upplýsir Vørn.

Eingin hevur heldur søkt um loyvi at sleppa í bretskan sjógv, men tað er ikki so løgið, tí makrelfiskiskapurin har er ikki fyrr enn síðst í árinum.

Einki av teimum 12 hava søkt um loyvi

12 skip sleppa at fiska makrel í norskum sjógvi í senn.

21 skip søktu um at sleppa í norskan sjógv sambært nýggju makrelsemjuni við Noreg.

Lutakast hevur verið hjá Vørn.

Einki av teimum 12 skipunum, sum vunnu lutakastið, hevur søkt um loyvi enn.

Tilsøgn fyri ein túr í senn

Tilsøgnin um at sleppa í norskan sjógv eftir makreli er givin til ein túr í senn.

Tá túrurin er liðugur, endar skipið niðast á listanum við teimum 21 skipunum. 

Tað ræður um at gera skjótt av, tí um skipið ikki er farið til fiskiskap í seinasta lagi 24 tímar eftir at hava fingið tilsøgn, fellur tilsøgnin burtur, og næsta skip á listanum sleppur framat.