Undantaksstøða lýst í russiska landslutinum Belgorod

Undantaksstøða er nú lýst í russiska landslutinum Belgorod, eftir at ukrainski herurin hevur lopið á mál har.

Sostatt eru tveir russiskir landslutir nú í undantaksstøðu - hin er Kursk beint norðanfyri Belgorod, har Ukraina leyp á í farnu viku.

Vyacheslav Gladkov, sum er guvernørur í Belgorod, sigur sambært BBC, at støðan er "sera trupul", tí ukrainski herurin javnan ger atsóknir inn í landið.

Hann sigur, at sivil fólk hava latið lív ella eru særd, og bygningar hava eisini fingið skaða, harímillum ein kirkja og ein bygningur hjá umsitingini, eins og ein gassleiðing eisini er rakt. 

Russland sigur, at 117 ukrainskar dronur eru skotnar niður í nátt í landspørtunum Kursk, Voronesj, Belgorod og Nisjny Novgorod.

Sambært ukrainska uttanríkisráðnum er Ukraina ikki áhugað í at yvirtaka russisk øki, men álopini verða framd fyri at trýsta Russland til at enda kríggið.