Silja vann bæði tølt og tvíspor

Silja G. Eystberg vann bæði tølt og besta flokkin í tvíspori, tá heystkappríðingin hjá Føroya Ríðingarfelag var leygardagin, og kann nú vinna FM í báðum greinunum, tá síðsta kappingin verður í Vágum um tvær vikur, skrivar Føroya Ríðingarfelag.

Unga havnargentan vann fyrst tølt á hestinum Tango, og síðan vann hon tvíspor á hestinum Óðin. Hon er samanlagt fýra stig fremst í tølt, og í besta flokkinum í tvíspori er hon eitt stig framman fyri Alberg B. Lútzen á Braga.

Tí er lagt upp til spennandi uppgerð um føroyameistaraheitið 31. august.