Eysturríki: Frælsisflokkurin vann, men sleppur neyvan í samgongu

Frælsisflokkurin, FPÖ, fekk flestar atkvøður á valinum í Eysturríki. Han fekk 29,2 prosent, vísir fyribils almenna úrslitið.

Innanríkisráðið í Wien legði í nátt út alment fyrstu fyribils úrslitini. 

Sambært teimum, fekk FPÖ 29,2 prosent av atkvøðunum, síðani kemur konservativi flokkurin, ÖVP, við 26,5 prosentum. 

Fyri ÖVP er afturgongd upp á 11 prosentstig síðani valið í 2019, meðan FPÖ hevði 13 prosentstig í framgongd.

Javnaðarflokkurin, SPÖ, er triðstørsti flokkur við 21,1 prosenti av atkvøðunum. Tað er lítil afturgongd, 0,1 prosentstig, síðani valið í 2019.

Hetta er fyrstu ferð, at Frælsisflokkurin er størsti flokkur á tjóðartingsvali í Eysturríki, og hetta er fyrstu ferð síðani seinna heimsbardaga, at ein flokkur ytst á høgravonginum hevur vunnið eitt val í Eysturríki, skrivar týska tíðindastovan DPA.

Karl Nehammer

Karl Nehammer, formaður í konservativa flokkinum, fær væntandi litið upp í hendur at skipa nýggja stjórn í Eysturríki. (Mynd: Reuter/Ritzau Scanpix)

Hava skrivað søgu

- Saman hava vit skrivað søgu í dag. Vit hava gloppað hurðini til eitt nýtt tíðarskeið. Tað, sum vit hava megnað, er meira, enn eg nakrantíð hevði droymt um, segði Herbert Kickl, formaður í Frælsisflokkinum, í gjár.

Hann sigur, at valsigurin er greitt tekin um, at alt ikki kann halda fram, sum tað hevur gjørt higartil í landinum. 

Men tað kann gerast torført hjá Kickl at fremja tað, sum hann ætlar - at avloysa konservativa kanslaran, Karl Nehammer.

FPÖ hevur ikki meirluta, og eingin av hinum flokkunum vilja skipa samgongu við Frælsisflokkin undir leiðslu av Kickl.

Andreas Babler

Andreas Babler er formaður í eysturríkska javnaðarflokkinum, SPÖ. (Mynd: Reuters/Ritzau Scanpix)

Forsetin eisini ímóti

Og tað er heldur ikki vist, at forsetin í Eysturríki, Alexander von der Bellen, fer at líta størsta flokkinum á valinum upp í hendur at skipa stjórn, skrivar DPA.

Forsetin, sum er fyrrverandi formaður fyri Grøna flokkin, hevur fleiri ferðir funnist at støðuni hjá FPÖ í sambandi við eitt nú ES, migratión og kríggið í Ukraina.

Tí eru sannlíkindi fyri, at Nehammer og konservativi flokkurin hjá honum verða tey fyrstu, sum fáa litið upp í hendur at skipa stjórn í Eysturríki, skrivar DPA.