Hesi fingu virðislønir Norðurlandaráðsins

Í gjár blivu ársins bestu avrik kosin innan fyri mentan og umhvørvi

Arnhildur Pálmadóttir vann ársins umhvørvisvirðisløn

Mynd: Árni Beinteinn, NN - norden.org

23.10.2024 - 06:30

Norðurlendsku virðislønirnar fyri mentanar- og umhvørvisavrik vóru latnar í Reykjavík í gjárkvøldið, og lat okkum bara siga alt fyri eitt, at eingin føroyingur vann.

Norðurlandaráðið letur virðisløn fyri barna- og ungdómsbókmentir, umhvørvi, tónleik, film og bókmentir og virðislønina fyri barna- og ungdómsbókmentir vann danin Jakob Martin Strid fyri bókina "Den fantastiske bus".

Umhvørvisvirðislønina fekk Arnhildur Pálmadóttir úr Íslandi.

Danin Rune Glerup fekk tónlistavirðislønina, og filmsvirðislønin var latin norska filminum "Sex", sum er skrivaður og instrueraður av Dag Johan Haugerud og framleiddur av Yngve Sæther og Hege Hauff Hvattum.

Seinasta virðislønin varð latin fyri bókmentir, og hana fekk norski rithøvundurin Niels Fredrik Dahl fyri skaldsøguna "Fars rygg".

Fýra føroyingar vóru innstillaðir. Henning Larsen Arkitektar til umhvørvisvirðislønina fyri nýggja róðrarneystið í Klaksvík, Rakel Helmsdal til barna- og ungdómsbókmentavirðislønina fyri bókina "Toran gongur", Tróndur Bogason til tónleikavirðislønina fyri verkið "Symphony no. 1 & 2 Sólárið" frá í ár og Kim Simonsen til bókmentavirðislønina fyri yrkingasavnið "Lívfrøðiliga samansetingin í einum dropa av havvatni minnir um blóðið í mínum æðrum".