Ov tíðliga at meta um ávirkan av skattaumskipanini

Enn er ov tíðliga at gera ítøkiligar metingar um, hvørja ávirkan skattaumskipanin hevur havt, bæði fyri virksemi í Føroyum og uttanlands.

Tað sigur Ruth Vang, landsstýriskvinna, í svari til Grím Sundstein, løgtingsmann, sum spurdi, hvørja ávirkan skattaumskipanin hevur havt fyri tey, sum arbeiða uttanlands.

Landsstýriskvinnan vísir á, at skattaumskipanin, sum var samtykt í fjør, hevði til endamáls at lækka inntøkuskattin og taka burtur skattligar fyrimunir við at arbeiða á sjónum ella uttanlands samanborið við at arbeiða á landi í Føroyum.

Skatturin lækkaður

Inntøkuskatturin er lækkaður í ár og lækkar aftur í 2025, meðan broytingarnar fyri føroyingar, sum arbeiða á sjónum ella uttanlands, henda fram til 2026.

Fíggjarmálaráðið gjørdi í sambandi við viðgerðina av umskipanina greiningar, sum vístu, hvussu ymsu bólkarnir fóru at verða ávirkaðir.

Enn er skattaárið 2024 ikki liðugt. Haraftrat skulu avleiðingar av skattabroytingum síggjast sum frá líður, tí flestu avleiðingarnar av slíkum bygnaðarligum broytingum henda, so hvørt sum fólk leggja lívið til rættis og taka støðu til starv, arbeiðstíð, útbúgving og so framvegis.

Frameftir eigur at verða arbeitt við, hvussu inntøkuskatturin ábyrgdarfult kann lækka enn meira, so tað ikki heldur fólki og fyritøkum aftur at arbeiða - bæði í Føroyum og uttanlands, sigur Ruth Vang, landsstýriskvinna.