Blinken ávarar um nýggjar ósemjur í Sýria

Amerikanski uttanríkisráðharrin, Antony Blinken, ávarar um, at nýggjar ósemjur kunnu koma í Sýria, nú uppreistrardeildir hava rikið sitandi forsetan, Bashar al-Assad, frá valdinum.

Blinken nevndi, at bæði ísraelskt og turkiskt hernaðarligt virksemi hevur verið á sýriskari jørð seinastu dagarnar.

- Tað hevur týdning, at vit tryggja okkum, at eingin nýggj ósemja kemur, segði Blinkan, tá ið hann vitjaði í grannalandinum hjá Sýria, Jordan.

Ísrael hevur seinastu vikuna framt fleiri luftálop á Sýria. 

Ísrael sigur seg royna at forða fyri, at vápn enda á 'skeivum hondum'.

Samstundis ávarar "Felagsskapurin fyri at banna lívfrøðiligum vápnum" um, at luftálop kunnu raka goymslur við lívfrøðiligum vápnum, og tað kann elva til dálking, skrivar AFP-tíðindastovan.