Varaborgarstjórin vil hava borgarstjóran at leggja frá sær

Varaborgarstjórin í Sunda kommunu, Hanna Paula við Streym, hevur heitt á borgarstjóran, Eyðstein Zachariasen, um at leggja frá sær.

Tað skrivar hon á sínum Facebook-vanga undir yvirskriftini “Eftirleikur til kommunuvalið 2024” í sambandi við, at Frihedsbrevet hevur skrivað, at borgarstjórin hevur sent tilsamans 11 kvinnum ónærisligar myndir uttan teirra samtykki.

Tað er komið undan kavi, eftir at samgongan var skipað, nær og á hvønn hátt myndirnar eru sendar.

Skot fyri bógvin

Hanna Paula við Streym, sum er ein av fýra kvinnum valdar á Kvinnulistanum, skrivar, at samstarvið, sum tey høvdu sæð fram til, av hesum hevur fingið eitt skot fyri bógvin.

Millum annað vísir hon á, at borgarstjorin er spurdur um hetta, men hevur svarað, at myndirnar vóru sendar við samtykki.

Hetta hevur seinni víst seg ikki at passa, og varaborgarstjórin sigur seg tí hava heitt á Eyðstein Zachariasen um at leggja frá sær.

Hanna Paula við Streym er sannførd um, at borgarstjórin ikki hevur sagt sannleikan, tá evnið varð viðgjørt á fundi, tí fleiri kvinnur hava vent sær til hennara við síni søgu.

Hanna Paula við Streym heitir á øll, sum fáa myndir sendandi, um at melda tað til politiið, tí blúnaðarskemd er lógarbrot.