Tøkniligu forðingarnar fyri MobilePay í Føroyum eru burtur

Talgildu Føroyar arbeiða saman við norska Vipps um at fáa sett hesa gjaldskortskipanina í gildi í Føroyum.

Tað upplýsir landsstýrismaðurin í vinnumálum, Høgni Hoydal, í svari upp á ein grein 52a-fyrispurning frá løgtingsmanninum, Steffan Klein Poulsen.

Tingmaðurin vildi hava at vita, um MobilePay ella onkur líknandi skipan var ávegis til Føroya.

Í svari sínum upplýsir landsstýrismaðurin millum annað, at MobilePay-skipanin nú er løgd saman við líknandi norsku Vipps-skipanina, sum verður sett í verk í millum annað Svøríki og Finnlandi.

Høgni Hoydal sigur, at hóast Talgildu Føroyar og Vipps samstarva, er ikki greitt, hvussu langt hetta arbeiðið er komið.

Men teknisku forðingarnar við MobilePay, ið vóru, skuldu ikki verið longur, so nú ber til at brúka MobilePay við føroyskum kontonummari.