12,7 milliardir í lønum í fjør - kvinnur áttu meginpartin av vøkstrinum

12,7 milliardir krónur vóru goldnar í lønum í fjør.

600 milliónir fleiri vóru goldnar í lønum í 2024 enn í fyrraárið. Vøksturin er fimm prosent, vísa tøl hjá Hagstovuni.

Lønarvøksturin seinastu árini hevur verið støðugur, men vøksturin í fjør var eitt vet minni enn undanfarin ár.

Í 2023 var lønarvøksturin 5,8 prosent, og í 2022 var hann 6,1 prosent størri enn árið fyri. 

Lønir

Kvinnur áttu meginpartin 

Kvinnur eiga størri part av lønarvøkstrinum í fjør enn menn.

Av teimum 600 milliónunum, sum vóru goldnar aftrat í lønum í fjør, áttu kvinnurnar meira enn 60 prosent, ella 370 milliónir. 

Kvinnur, sum arbeiða hjá almennum arbeiðsgevarum, áttu 326 milliónir. 

<

Hagtølini vísa, at Sandoyar-økið hevði størsta lønarvøksturin í fjør, ella átta prosent. Hinvegin hevði Suðuroyggin minsta vøksturin, 1,4 prosent.