Vindmyllur í Sandoynni: Effo lægsta boðið, men størstu príshækkingina

Effo hevur lægsta boðið, men størstu príshækkingina. Magn hevur hægsta boðið, men onga príshækking innlagda.

Tað vísir innlit, sum Kringvarpið hevur fingið í tilboðini upp á vindmyllulund í Klivaløkshaga í Sandoynni. Tilboðini komu inn í gjár.

Effo hevur tvey tilboð: Annað sigur, at prísurin verður 25,90 oyru fyri kilowatttíman, og hitt er 26,10 oyru fyri kilowatttíman. Aftrat hesum kemur ein prísvøkstur upp á  2,5 prosent um árið.

Tilboðið hjá Magn er 30,70 oyru fyri kilowatttíman, men har er eingin prísvøkstur lagdur aftrat

Felagið Vindorka undir stovnan hjá Jóhan í Niðristovu hevur eisini tvey tilboð, ávikavist 27,40 oyru og 26,97 oyru fyri kilowatttíman, og har er prísvøksturin 1,25 prosent um árið.

Tilboðið hjá SEV er 29,60 fyri kilowatttíman við einum prísvøkstri upp á 1 prosent.

Ari Johanneson

Ari Johanneson er leiðari á Elveitingareftirlitinum. 

20 ár

Tilboðini og prísirnir eru givin yvir eitt áramál, sum er 20 ár.

- Vit eru nú í ferð við at viðgera umsóknirnar og vænta at vera komin til eina niðurstøðu um hálvan februar, sigur Ari Johanneson, leiðari í Elveitingareftirlitinum hjá Umhvørvisstovuni.

Onnur viðurskifti enn grundprísirnir kunnu eisini gera seg galdandi. 

Náttúrufriðingarnevndin gav í fjør loyvi til, at vindmyllur kunnu byggjast í Klivaløkshaga. Tann avgerðin er farin í Yvirfriðingarnevndina, sum eigur endaligu avgerðina. Yvirfriðingarnevndin hevur ikki tikið ta avgerðina enn.

Ætlanin er, at sjey vindmyllur skulu setast upp, og arbeiðið skal vera liðugt innan tvey ár.