Báðir samgonguflokkarnir í Grønlandi hava afturgongd

Báðir samgonguflokkarnir í Grønlandi, IA og Siumut, hava afturgongd í einari veljarakanning, sum greiningarfyritøkan Verian hevur gjørt fyri Sermitsiaq og Berlingske.

Samstundsis hevur flokkurin Demokraatit framgongd.

Kanningin er gjørd frá 22. til 27. januar, t.e. stutt fyri at landstingsvalið var útskrivað.

Á valinum í 2021 fekk IA 36,6 prosent av atkvøðunum, men nú hevði flokkurin fingið 31 prosent, vísir kanningin.

Siumut fekk 29,5 prosent av atkvøðunum á valinum seinast, men nú fær flokkurin 21,9 prosent.

Tvífaldar atkvøðutalið

Demokraatit meiri enn tvífaldar atkvøðutalið samanborið við valið fyri fýra árum síðani. Tá fekk flokkurin níggju prosent, men nú stendur hann til at fáa 18,8 prosent.

Naleraq hevur eisini framgongd. Kanningin vísir, at flokkurin fær 16,5 prosent av atkvøðunum afturímóti 12 prosentum í 2021.

Attasut hevur eisini eina lítla framgongd, úr sjey prosentum fyri fýra árum síðani upp í 9,7 prosent. 

Vert er tó at leggja til merkis, at 30 prosent av teimum umleið 500 fólkunum, sum eru spurd í kanningini, hava ikki tikið støðu til, hvønn tey fara at velja. 

Landstingsvalið í Grønlandi verður 11. mars.