Valnevndin í Oyndarfirði skrivar aftur krossar

Politiið kannar nú aftur hondskriftina hjá teimum í valnevndini í Oyndarfirði í sambandi við, at meldað er fyri valsvik.

Hetta er partur av kanningararbeiðinum í málinum, har meldað var fyri valsvik á valstaðnum í Oyndarfirði á kommunuvalinum í november.

Tað var Jonhard Danielsen, sum meldaði fyri valsvik, tí ein atkvøða til hansara úr Oyndarfirði bleiv ógildað í fínteljingini, av tí at hon var ótýðilig.

Jonhard Danielsen - mynd av Facebook-vanga

Jonhard Danielsen. (Mynd av Facebook-vanga)

Ikki rætt pappír

Politiið fekk í desember tey trý fólkini í valnevndini í Oyndarfirði at skriva krossar, sum ein skriftkønur í Danmark síðani skuldi kanna. Men pappírið var ikki tað rætta, og ein av limunum skrivaði krossar niður á lærið á baksetrinum í einum politibili.

Tilfarið kundi ikki brúkast, og tí skulu krossarnir setast av nýggjum á rætt pappír, við røttum undirlagi, so teknikararnir í Danmark kunnu kanna krossarnar av nýggjum, og á røttum grundarlagi.

Micael Boolsen, fúti, vil ikki gera viðmerkingar til málið, annað enn at slíkt kanningararbeiði ofta tekur tíð.

Bárður Árnason, formaður í lokalu valnevndini í Oyndarfirði, vil heldur ikki gera viðmerkingar til málið, annað enn, at hann er farin at troyttast av hesum málinum.