Mark Carney verður nýggjur forsætisráðharri í Kanada

Seint í gjárkvøldið varð greitt, at Mark Carney verður nýggjur forsætisráðharri í Kanada. Hetta hendi, tá ið atkvøðurnar til formanssessin í Liberala flokkinum vórðu taldar upp.

Fýra fólk stillaðu upp til formansvalið, men Mark Carney, fyrrverandi stjóri í kanadiska tjóðbankanum, var greiður vinnari. Hann fekk 86 prosent av atkvøðunum. 

Justin Trudeau, sum hevur verið forsætisráðharrin síðani 2015, boðaði í januar frá, at hann gevst sum formaður í Liberala flokkinum og tí eisini sum forsætisráðharri. 

Mark Carney, Kanada

Mark Carney loysir Justin Trudeau av sum formaður í Liberala flokkinum og harvið eisini sum forsætisráðharri í Kanada (Mynd: Ritzau / Scanpix)

Mark Carney verður stjórnarleiðari í einum landi, sum er í handilskríggi við USA. 

Donald Trump, amerikanski forsetin, hevur fleiri ferðir nevnt, at Kanada átti at verið innlimað í USA og harvið verið tann 51. staturin í USA. 

Mark Carney segði við fólkamongdina, sum fegnaðist saman við honum um valsigurin, at hansara stjórn bara fer at gera handilsavtalur við álítandi samstarvsfelagar.

Hann segði eisini:

- Kanada fer aldrin, aldrin nakrantíð, á nakran sum helst hátt at gerast partur av Amerika.

Mark Carney, Kanada

Mynd: Ritzau / Scanpix