Lektari á verjuháskúla: "Russland ikki sinnað til vápnahvíld her og nú"

Peter Viggo Jakobsen, lektari við lærda verjuháskúlan í Keypmannahavn, roknar ikki við, at Russland er sinnað at gera eina vápnahvíld her og nú, eftir at Ukraina og USA í gjár gjørdu semju um vápnahvíld í 30 dagar.

Í gjár kom fram, at Ukraina hevur tikið undir við einum amerikanskum uppskoti um vápnahvíld í 30 dagar beinanvegin.

Amerikanski uttanríkisráðharrin, Marco Rubio, sigur, at bólturin liggur nú hjá Russlandi, um at fáa vápnahvíld í lag.

Russiski uttanríkisráðharrin, Sergej Lavrov, sigur, sambært Reuters, at Russland fer ikki at góðtaka eina vápnahvíld, sum "setur lív í vanda".

Lavrov endurtekur eisini støðuna hjá Russlandi um, at landið undir ongum umstøðum fer at góðtaka, at NATO-hermenn skulu vera til staðar í Ukraina, um ein varandi friðaravtala verður gjørd.

Peter Viggo Jakobsen

Peter Viggo Jakobsen, lektari við lærda verjuháskúlan í Keypmannahavn, sigur í samrøðu við DR, at hann roknar ikki við, at Russland er áhugað í einari vápnahvíld her og nú.

Peter Viggo Jakobsen roknar við, at stríðið millum Russland og Ukraina endar við einari frystari ósemju, men at eingin beinleiðis friðaravtala verður millum londini bæði.