Rættarfundir við Tjarnir

Týsdagin verður aftur eitt av teimum stóru rúsevnismálunum í Føroya rætti.

Seks menn eru ákærdir fyri at hava smuglað 18 kilo av hassji og 800 gramm av hassjolju til Føroya í fjør heyst við tí endamáli at selja hassjið í Føroyum.

Ein teirra kom til Føroya við hassjinum í bátinum Emelie úr Danmark.

Báturin legði at á Sandi.

Tveir aðrir, sum eru ákærdir, gróvu hassjið niður í haganum oman fyri omankoyringina til Kirkjubøar.

Menninir eru eisini ákærdir fyri at royna at hvítvaska 1,3 mió. kr.

Tveir teirra vóru tiknir, tá teir koyrdu um borð á Norrønu 17. oktober í fjør.

Tollarar funnu pengarnar, 1,3 mió. kr., í holrúmum í bili teirra.

Teir skuldu til Danmarkar.

Politiið sigur, at pengarnir stava frá ólógligum virksemi. 

Eisini amfetamin

Ein av teimum seks er eisini ákærdur fyri at selja ella lata 200 gramm av amfetamini í Føroyum.

Tað skal sambært ákæruritinum hava verið frá 24. til 27. januar í ár, og skal vera gjørt í samráði við eina kvinnu.

Ákæruvaldið krevur, at hald verður lagt á vinningin, 134.182 kr..

Kravt verður eisini, at hald verður lagt á 780 evrur, góðar 5.800 krónur. 

Í øllum málum eru, sambært ákæruritinum, ókendir gerningsmenn, bæði í Føroyum og í Danmark. 

Allir teir seks ákærdu eru í varðhaldi, tríggir í Mjørkadali og tríggir í Vestre fængsel.

Av tí at seks ákærdir eru, er Dómhúsið í Havn ov lítið, so rættarfundirnir vera við Tjarnir.

Vikan eftir páskir er sett av til rættarmálið, og flaggdagurin verður eisini brúktur.