Óbeinleiðis skuldin telur ikki við

Nettoskuldin hjá landskassanum var 200 mió. kr. við ársenda 2024.

Marknaðarvirðið hjá lánsbrævaskuldini var fimm milliardir krónur.

Og gjaldføri landskassan var 4,8 mia. kr., skrivar Landsbankin í ársfrágreiðing sínari.  

Landsbankin umsitur lánsbrævaskuldina hjá landskassanum.

Hon er tann beinleiðis rentuberandi skuldin hjá landskassanum. 

Tó er eisini onnur skuld, sum landskassin óbeinleiðis er eksponeraður fyri.

Onnur skuld

Eitt nú skuldin hjá kommununum og skuldin hjá tunnilsfeløgunum. 

Henda óbeinleiðis skuld er ikki tald við í skuldina, sum er fimm milliardir, skrivar landsbankin.

Landsbankin hevði 11,5 milliónir í útreiðslum í fjør.

Á inntøkusíðuni var játtanin 1,6 mió. kr., men inntøkan var 3,6 mió. kr. 

Landsbankin fær pengar fyri at umsita Samhaldsfasta og ogn hjá almennum grunnum. 

Netto vóru útreiðslurnar tí 7,9 mió. kr., nógv minni enn játtanin, sum var níggju milliónir.