Ikki pláss fyri einum túri aftrat á Nólsoyarleiðini

Sum ferðaætlanin er nú, er ikki pláss fyri einum túri av Havnini til Nólsoyar klokkan átta um kvøldið.

Tað sigur Jóhan Christiansen, landsstýrismaður, í svari til Karlot Hergeirsson, løgtingsmann.

Fólk í Nólsoy vilja fegin hava ein túr aftrat. Og hann skal vera av Havnini klokkan 20.00.

Pengar eru í fíggjarlógini í ár til ein dagligan túr afturat, sigur Karlot Hergeirsson.

Jóhan Christiansen svarar, at Strandfaraskip landsins hava gjørt greiningar.

Flyta onkran túr

Niðurstøðan er, at ikki ber til við verandi ferðaætlan at leggja ein túr inn kl. 20.00.

Tí forða ásetingar um hvílitíð, arbeiðstíð og trygd fyri. 

Ein møguleiki er at flyta onkran túr.

Hetta krevur neyvt samskifti við nólsoyingar, so broytingarnar ikki elva til aðrar avbjóðingar fyri tey, sum brúka leiðina.

Strandfaraskip landsins fara í næstum at biðja um fund við staðbundnu nevndina í Nólsoy, sigur Jóhan Christiansen.