Starvsfólk á ísraelsku sendistovuni í USA skotin

Tvey fólk, sum starvaðust á ísraelsku sendistovuni í Washington D.C. í USA, eru skotin í nátt.

Ein 30 ára gamal maður er undir illgruna fyri at hava framt illgerðina, og hann er handtikin.

Tey bæði vóru skotin nærindis jødiska savninum í býnum. Tey doyðu av løstunum.

Tað skriva fleiri altjóðir miðlar.

Maður og kvinna

Á einum tíðindafundi tíðliga í morgun, føroyska tíð, segði Pamela A. Smith, ovasti fyri politiið í Washington D.C., at tey bæði skotnu vóru ein maður og ein kvinna.

Hon segði, at tann, sum er undir illgruna, fór til fýra fólk uttan fyri savnið, tók ein revolvara fram og skeyt tvey teirra. Hann var seinni tikin av trygdarfólkunum á savninum.

Pamala A. Smith sigur, at hann rópti "Free, free, Palestine", tá ið hann var handtikin. 

- Hesi drápini, sum helst eru orsakað av antisemitismu, mugu halda uppat. Hatur og radikalisma hoyra ikki heima í USA, segði Donald Trump, forseti.