Noktar seg sekan í ákæru um serliga grovan og ráan harðskap

Maðurin, sum er ákærdur fyri serliga grovan, ráan ella vandamiklan harðskap og ólógliga inntreinging í Skálafirði 21. november í fjør, noktar seg sekan.

Skuldsetingin var drápsroynd, men nú ákæruritið er skrivað, er ákæran serliga grovur, ráur ella vandamikil harðskapur.

Maðurin, sum er 32 ár, hevur verið í varðhaldi í Mjørkadali síðani hendingina í fjør.

Sambært ákæruritinum krógvaði maðurin seg í einum bilskúri.

Tá ein maður nærkaðist skúrinum, leyp tann ákærdi fram og gav honum nevan á vangan.

Hann stakk síðani mannin ikki minni enn tvær ferðir við stórari megi í bringuna.

Maðurin fekk nøkunlunda vart fyri seg, men fekk tó stungusár høgrumegin í bringuni.

Kvívsblaðið var 13,5 sentimetrar.

Royndi at sleppa inn í íbúðina

Beint eftir hetta royndi tann ákærdi at sleppa inn í íbúðina, sum er í erva í bilskúrinum.

Har var fyrrverandi unnusta hansara. Hon bardist ímóti og fekk læst hurðina.

Sambært ákæruritinum ætlaði maðurin at fremja grovan harðskap móti henni, millum annað við knívinum.

Ákæruvaldið tekur fyrivarni fyri kravi um, at maðurin verður vístur av landinum, verður hann dømdur.

Fyrivarni er eisini tikið fyri endurgjaldskravi.

Maðurin er fyrr dømdur fyri at hótta víð knívi, Tað var í februar í fjør í Klaksvík.

Hann fekk 30 dagar. Revsingin er treytað.