Inflatiónin í evrulondum er nú 1,9 prosent

Inflatiónin í evrulondunum er lækkað úr 2,2 prosentum niður í 1,9 prosent í mai mánaði.

Tað skrivar TV2, sum hevur Ritzau sum keldu, og tíðindastovan vísir til tøl frá evropeiska hagtalsstovninum, Eurostat.

Roknað var við, at inflatiónin í Evropa endaði á tveimum prosentum, men hon fór enn longur niður, og tað er fyrstu ferð síðan september í fjør, at prísvøksturin er minni enn tvey prosent.

Sambært leiðandi greinara hjá Danske Bank er væntandi, at prísvøksturin fer at halda sær um tvey prosent næstu mánaðirnar.

Eurostat

Eurostat er evropeiski hagtalsstovnurin. 

Innfluttar vørur bíligari

- Eftirspurningurin á heimsmarknaðinum eftir evropeiskum vørum er minkaður av handilsstríðnum, og sterka evran ger, at innfluttar vørur eru bíligari. Hetta hevur við sær, at prísvøksturin er lítil, sigur Bjørn Tangaa Sillemann, greinari.

Sambært Ole Krohn, sum er vinnugreinari hjá TV2, hevur lítla inflatiónin við sær, at Evropa stendur sterkari enn USA, tá tað snýr seg um at sleppa undan, at hægri prísir skulu kollrenna búskapin. Og lítli prísvøksturin kann eisini geva rúm fyri fleiri evropeiskum rentulækkingum, leggur hann aftrat.

Sambært Ole Krohn er hetta kanska løtan hjá ES at satsa eina trísiffraða milliardaupphædd til at seta ferð á eina umfatandi vakstrarætlan, sum bæði snýr seg um talgilding og grønt orkuskifti. Og í Danmark kann lítla inflatiónin hava við sær, at reallønin hjá vanligum løntakarum hækkar, so nýtslan eisini kann vaksa. 

Til samanberingar kunnu vit siga, at føroyski prísvøksturin - inflatiónin - var 1,3 prosent í februar. Nýggj tøl koma frá Hagstovuni seinast í hesum mánaðinum.