Skuldsettur fyri ikki at hava ávaringarskipanina tendraða

Niðurlendski skiparin á kypriska farmaskipinum, NCL Salten, sum 22. mai næstan sigldi inn í sovikamarið hjá einum norskum manni á Byneset í Tróndheimi, verður nú av norsku løgregluni skuldsettur fyri, at ávaringarskipanin á brúnni ikki var tendrað.

Tað skrivar norska kringvarpið, NRK.

Løgreglan avhoyrdi skiparan mánakvøldið, og út frá øllum avhoyringum og prógvum heldur løgreglan seg hava fingið vissu fyri, at ávaringarskipanin á brúnni ikki var tendrað, og løgreglan heldur seg eisini hava fingið prógv fyri, at skiparin, ein 60 ára gamal niðurlendingur, sjálvur var á vakt, tá skipið byrjaði túrin á Averrøy beint fyri midnátt.

Sambært løgregluni er tað skiparin, sum hevur endaligu ábyrgdina, og tað er brot á góðan sjómansskap ikki at hava ávaringarskipanina tendraða, sigur norska løgreglan sambært NRK.

Skiparin var ikki sjálvur á vakt, tá skipið fór á land. Tá var stýrimaðurin á vakt, men hann var sovnaður. Skiparin noktar seg sekan.