Fleiri fráboðanir um barnapornografi og kynsligt samband við børn

Fráboðanirnar um kynslig brotsverk eru vaksandi í Føroyum. Tað vísa hagtølini hjá Føroya Politi fyri 2024. Serliga tann bólkurin av fráboðanum, sum eitur barnapornografi og kynsligt samband við barn undir 15 ár, er voksin sera nógv. Úr 13 í 2020 og upp til 109 fráboðanir í 2024. Michael Boolsen, fúti, sigur í frágreiðingini, at tað kann benda á, at myrkatøl hava verið á økinum áður. og at tað kann vera ein av orsøkunum til, at fráboðanirnar eru vaksnar úr 13 í 2020 til 109 fráboðanir í 2024. Danska fólkatingið samtykti 27. mai í ár ein pakka av lógarbroytingum í donsku revsilógini, sum skulu styrkja arbeiði hjá politinum í tílíkum málum. Tað umfatar millum annað eina herðing fyri at hava barnapornografiskt tilfar, sum er skapt av vitlíki, um hendi. Men í Føroyum er tað ikki ólógligt.