Veiðigjaldið á sild farið niður í helvt

Veiðigjaldið fyri sild fyrra hálvárið í ár er farið niður í helvt.

Tað er nú 59 oyru kilo.

Tað var eina krónu og 18 oyru sambært kunngerð, sum kom í fjør summar.

Orsøkin er, at sildarkvotan er so lítil í ár.

Landskassin missir eisini helvtina

Lógin um veiðigjald sigur, at minkar kvotan niður um eina helvt av miðalkvotuni, fer veiðigjaldið niður í helvt.

Fyri landskassan merkir tað, at veiðigjaldið frá norðhavssildini ikki verður 33 milliónir, men 16,5 milliónir krónur í fyrra hálvári í ár.

Veiðigjøldini fyri makrel og svartkjaft eru tey somu, sum vóru kunngjørd í fjør summar.

Tey eru eina krónu og 45 oyru fyri kilo av makreli og 40 oyru fyri svartkjaft.