Kommunur skulu hava ferðavinnuætlan á nýggjárinum

Allar kommunur skulu nú gera eina ferðavinnuætlan í seinasta lagi 31. desember í ár.

Kunngerðin um tað kom í gildi hósdagin.

Endamálið við kommunalari ferðavinnuætlan er at menna og fyriskipa ferðavinnuna, so hon sum minst ger seg inn á náttúru, djóralív, heimafólkið, mentan og mentanararv.

Ferðavinnuætlanin skal tryggja fyrilit fyri náttúruligum, jarðfrøðiligum, mentanarligum og søguligum virðum og tilfeingi.

Hon skal menna trivnað, mentan og vinnumøguleikar á staðnum og órógva landbúnað og annað virksemi sum minst.

Kunngerðin hevur eisini ásetingar um avmarkingar.

Tær kunnu vera mest loyvda ferðafólkatal, mesta tal av bilum og bussum, ásetingar um parkering, forboð fyri handilsligari ferðavinnu ávísar dagar ella ávísa tíð í samdøgrinum.

Handilslig ferðavina

Kunngerðin er eisini um avtalur, sum kommunur gera um handilsliga ferðavinnu.

Har stendur, at ikki er loyvt at krevja, at ferðafólk, fyri at fáa atgongd at ávísum øki, skulu gjalda fyri eina tænastuveiting.

Og tað er bannað at taka gjald fyri atgongd at lendi.

Hetta eru meginreglurnar.

Undntøk eru frá teimum.

Sambært teimum er loyvt at krevja pengar fyri tænastur.