Skaðadjóratýnari: "Kakkulakkar trívast væl inni hjá fólki í Føroyum"

"Ja, tað hava vit gjørt nógv av." 

Heini Magnussen og hini frá Skaðadjóratænastuni verða ofta tilkallað at burturbeina kakkulakkar í Føroyum. 

Tað greiðir hann frá, nú kakkulakkar eru sæddir umborð á avloysaraskipinum fyri Smyril, Galaxy. 

Bakteriubumba

"Kakkulakkurin er ein umvandrandi bakteriubumba, ið trívist har tað er skitið, og hann livir av óhumsku," staðfestir Heini Magnussen, ið væl skilir, at føroyingar ikki vilja hava, at kakkulakkur fær beinini fyri seg í Føroyum. 

"Kakkulakkar bíta ella stinga ikki, men teir eru smittuberar."

Kakkulakkarnir, ið Skaðadjóratænastan hevur burturbeint í Føroyum, koma úr heitari londum, har teir eru vanligir. 

"Tað er enn ikki staðfest, at kakkulakkurin kann liva í føroysku nattúruni, tí vit hava ov kalt verðurlag, tíbetur. Men fyri tað, um tað er kalt úti, so er tað ikki kalt inni hjá fólki og í bygningum. Har trívist kakkulakkurin øgiliga væl."

Hoyr samrøðuna við Heina Magnussen, stjóra í Skaðadjóratænastuni.