Sissal Jóhanna verður við í síðsta umfarinum av Vild med dans

2025 verður eitt ár, ið Sissal Jóhanna Norðberg Niclasen úr Havn ongantíð gloymir. 

Fyrst vann hon danska Melodi Grand Prix'ið við sanginum "Hallucination", ið tryggjaði henni luttøku í Eurovision-sangkappingini í Basel, Sveis. 

Har gjørdi hon ikki mætari enn at syngja Danmark í finaluna fyri fyrstu ferð síðani 2019. 

Síðan sprongdi hon áskoðarametið á Spæliplássinum á ársins G! festivali. 

Og nú skal hon luttaka í seinasta umfarinum av kendu donsku undirhaldssendingini Vild med dans hjá TV2.

Sissal Jóhanna Norðberg Niclasen, Vild med dans

Besta dansifelaga

Sissal Jóhanna er spent. 

"Tað er heilt óveruligt og ein stórur heiður at sleppa at vera partur av sendingini, sum eg trúliga hvønn fríggjadag heilt frá barnsbeini av havi hugt eftir heima á sofuni saman við familjuni," skrivar hon á sínum vangum á sosialu miðlunum. 

Sissal Jóhanna heldur seg eisini hava fingið besta dansifelaga, tí hon skal dansa saman við Eugen Miu, sum vann Vild med dans í fjør. 

"Eg klári slett ikki at bíða við at vísa tykkum, hvat hesi gomlu beinini kunnu.... ella ikki kunnu," skemtar Sissal Jóhanna. "Tað verður ein vill ferð, og góðu gevið mær meira enn tvær atkvøður hvønn fríggjadag," leggur hon afturat við einari speirekandi tilsiping til stigatalið, ið hon fekk frá hyggjarunum í Eurovision-finaluni.