Eiga at kanna viðurskiftini hjá heimansettum føroyingum

Tað er í tøkum tíma, at politiska skipanin vísir áhuga fyri at fara undir eina kanning av tí, sum fór fram, tá føroyingar við menningartarni vórðu sendir til Danmarkar á stovn.

Tað sigur Enna Garðshorn Mikkelsen, etnologur, sum hevur granskað í hesum.

Fram til 1973 vórðu fleiri føroyingar, sum høvdu menningartarn, sendir á danska stovnin Rødbygaard í Lollandi.

Eiga at kanna ábyrgdina hjá føroyskum myndugleikum

Danska stjórnin bað fyri tveimum árum síðan um umbering fyri sína viðferð av teimum, sum vóru heimansett í ser- og andveikraforsorgini í tíðarskeiðinum frá 1933 til 1980.

Tað gjørdi hon í kjalarvørrinum á einari søguligari kanning, sum varð almannakunngjørd tíðliga í 2022.

Men spurningurin, hvørt føroysku myndugleikarnir høvdu eina ábyrgd í tí, sum fór fram, tá føroyingar við menningartarni, vórðu sendir á danskar stovnar, er framvegis ósvaraður.

Spurningurin, um Føroyar eisini skulu biðja um umbering, varð viðgjørdur í Breddanum í farnu viku.

Eg havi bíðað í meira enn tjúgu ár eftir einari kanning frá politisku skipanini um júst hendan partin av føroysku søguni.

Enna Garðshorn Mikkelsen

Ein føroysk kanning møguliga á veg

Landsstýrismaðurin í almannamálum, Eirikur í Jákupsstovu, segði í útvarpstíðindunum í farnu viku, at hann er sinnaður at fara undir eina kanning.

Eisini hava MEGD og Javni, afturat løgtingsforkvinnuni, Bjørt Samuelsen, gjørt vart við, at tørvur er á einari slíkari kanning.

Hoyr meira í innslagi í útvarpstíðindunum: