Danir rinda allar útreiðslur fyri grønlendingar á donskum sjúkrahúsum

Danskir myndugleikar fara nú at rinda allar heilsuútreiðslur fyri grønlendskar sjúklingar á donskum sjúkrahúsum.

Metta Frederiksen, forsætisráðharri, og grønlendski landsstýrisformaðurin, Jens-Frederik Nielsen, hava í dag skrivað undir avtaluna, sum tryggjar, at Danmark rindar tær umleið 140 mió. krónurnar, sum tað kostar Grønlandi at senda sjúklingar á sjúkrahús í Danmark til viðgerðar.

Landsstýrisformaðurin hevur leingi arbeitt fyri, at Danmark skal taka sær av rokningini, so at Grønland í staðin kann brúka peningin til at lætta um og gera ábøtur í grønlendska heilsuverkimum.

Fólkatingið góðkenna avtaluna

Danska fólkatingið skal tó góðkenna avtaluna, áðrenn hon kann setast í gildi, skrivar grønlendski miðilin Sermitsiaq.

- Semja er um at kanna møguleikan fyri framhaldandi stuðli og samstarvi á heilsuøkinum, stendur í avtaluni.

Sambært fráboðanini frá grønlendska landsstýrinum, eru ætlanir um nýggj átøk og íløgur, sum skulu bøta um vælferðina í Grønlandi og stuðla upp undir meira sjálvberandi búskap í landinum.

Føroysku útreiðslurnar fyri føroyskar sjúklingar á donskum sjúkrahúsum eru til samanberingar 154 mió. kr., umframt 30 mió. kr. til sjúklingahotellið. 

Føroyski landskassin ber allar hesar útreiðslurnar.