NATO-sendiharrar viðgjørdu russiskan ágang í loftrúmi

Á middegi hevði aðalskrivarin í NATO, Mark Rutte, tíðindafund í kjalarvørrinum av, at Russland hevur gjørt seg inn á loftrúmið í limalondum hjá NATO.

NATO-sendiharrar hittust í dag, eftir at Estland mikudagin boðaði frá, at russisk flogfør vóru í estiskum loftrúmi uttan loyvi.

Hetta hevði við sær, at Estland gjørdi av at brúka grein 4 í Norðuratlantssáttmálanum.

Grein 4 sigur, at partarnir skulu samráðast hvør við annan, tá ið økisrætturin hjá einum er hóttur.

Seinastu vikurnar hava russiskar dronur eisini verið í Rumenia og Póllandi.

- Eg haldi, at russar gjørdust greiðir yvir, at vit eru til reiðar at verja hvønn tumma av okkara øki. Vit eru ein verjusamgonga, men vit eru ikki bláoygd. Um tað var tilætlað ella ikki, so mugu vit verja okkum sjálvi, segði NATO-aðalskrivarin á tíðindafundinum.

Hann segði eisini, at tað er ov tíðliga at siga, hvat er farið fram í málinum um dronurnar, sum vóru yvir flogvøllinum í Keypmannahavn í gjár.