ES-lond ósamd um fleiri tiltøk móti Russlandi

ES-londini eru framvegis  ósamd um 19. pakkan við revsitiltøkum móti Russlandi.

Tá ES-sendiharrar hittust í gjárkvøldið, boðaði Eysturríki frá, at tað ikki tók undir við revsitiltøkunum, skrivar Bloomberg.

Eysturríki krevur, at revsitiltøkini móti einum russiskum felag verða sett úr gildi, so at peningur úr felagnum kann flytast til ein eysturríkskan peningastovn.

Eysturríki stóð einsamalt í kravinum, og onnur ES-lond stúra nú fyri, at hetta kann elva til eitt óheppið fordømi.

Krevur undirtøku frá øllum limalondum

Revsipakkin skal hava undirtøku frá øllum limalondunum fyri at verða samtyktur.

ES hevur arbeitt við nýggjasta pakkanum við revsitiltøkum móti Russlandi síðani fyrst í september.

Men ES-sendiharrarnir eru í hvussu er samdir um eina ætlan um at gevast at brúka alla russiska olju og gass innan januar 2028, skrivar Reuters.

Ráðharraráðið skal atkvøða um ætlanina 20. oktober.