Grundøkið í Leitinum verður nú boðið út av nýggjum

Nú skulu onnur sleppa framat tí 12.300 fermetra stóra grundøkinum í Leitinum í Saltangará, har smápartafelagið "í Leitinum" upprunaliga ætlaði at byggja 180 íbúðir.

Á býráðsfundi seinnapartin fer Runavíkar býráð taka støðu til, um grundøkið skal bjóðast út av nýggjum.

Tekniska deild hjá Runavíkar Kommunu hevur tillagað gamla útboðstilfarið, soleiðis at grundstykkið verður boðið út sum eitt grundstykki í almennum útboði við føstum prísi.

Freistin verður ásett til 14 dagar. 

Verkætlanin var ov dýr

Smápartafelagið "í Leitinum", sum er dótturfelag hjá danska felagnum "St. Jørgen Ejendomme AS", boðaði í summar frá, at tey høvdu slept ætlanini at byggja tær 180 íbúðirnar. 

- Verkætlanin hongur ikki saman fíggjarliga, segði Jóhannus Egholm Hansen, nevndarformaður, við útvarpið 2. juni.

Tað eru nú góð fýra ár síðani, at felagið gjørdi avtalu við Runavíkar kommunu um at byggja íbúðir á 12.300 fermetrar stóra økinum í Saltangará.