USA og Kina skulu hava hernaðarligar samskiftisrásir

USA og Kina eru samd um at gera hernaðarligar samskiftisrásir millum londini.

Tað skrivar amerikanski verjumálaráðharrin, Pete Hegseth, á sosiala miðlinum X.

- Eg havi júst tosað við Trump, forseta, og vit eru samdir um, at sambandið millum USA og Kina ongantíð hevur verið betri, skrivar verjumálaráðharrin.

Donald Trump og Xi Jinping

Donald Trump og Xi Jinping hittust í síðstu viku. 

Boðini koma eftir, at Donald Trump, forseti, í síðstu viku hevði fund við kinesiska starvsbróðurin, Xi Jinping, og Hegseth hevði fund við kinesiska verjumálaráðharran, Dong Jun, í sambandi við ein toppfund í Malaysia.

Hegseth skrivar, at hann og kinesiski starvsfelagi hansara eru samd um, at "friður, støðufesti og góð viðurskifti eru besta leiðin fyri hesi bæði stóru og sterku londini".

Samskiftisrásirnar skulu forða fyri, at trupulleikar gerast til ósemjur, og minka um ósemjurnar.

- Vit fara at hava fleiri fundir um hetta í næstum, skrivar Hegseth.