Vaknaðu við kaldan dreym ímóti náðileysum kroatum

Føroyar vóru í dreymalandi nakrar minuttir í fyrra hálvleiki, men skjótt vísti Kroatia, hví teirra landslið eru nummar 11 í heiminum, og so vaknaðu føroyingarnir við kaldan dreym. HM-endaspælið kámaðist og hvarv til endans heilt.

Géza Dávid Turi skeyt sítt fyrsta landsliðsmál, tá hann við einum avrættaðum skoti av brotsteigarmarkinum legði Føroyar framum eftir gott korter. 

 - Tað var ein ótrúlig kensla, tá mann skýtur og sær, at bólturin fer í málið ímóti Kroatia. Mann fer í sjokk, tí tá veit mann, at mann hevur ein kjans at kvalifisera seg, segði málskjúttin, sum fekk føroyskt pass í januar eftir drúgva bíðitíð.

HM-dreymurin brast

Røkkstøkk-dysturin um pláss í HM-endaspælinum hvarv kortini sum døgg fyri sól. Josko Gvardiol javnaði stutt eftir føroyska leiðslumálið eftir ivasamt verjuspæl í føroyska brotsteiginum, og eftir steðgin settu kroatar ferðina upp, tá Petar Musa og Nikola Vlasic tryggjaði heimaliðnum sigurin frammanfyri fegnari áskoðarafjøld í Rijeka.

Kroatar vístu, hví teir eru fremst í bólkinum, helt venjarin, Eyðun Klakstein, sum kortini ikki fekk latið vera við at iðra seg um laka úrslitið.

 - Tú verður nógv bjóðaður av, og vit stóðu nógv í verjustøðu. Men onkuntíð hava vit klára at forða fyri eitt sindur meir enn í dag, og vit fingu ivaleyst av kontra til at skora meir eisini, staðfesti venjarin, sum kortini er væl nøgdur við undankappingina, sum við 12 stigum er hin besta hjá mandslandsliðnum yvirhøvur.

Ætlar sær til EM-endaspælið

Andrias Edmundsson iðraði seg eisini um tapið, men var kortini bjarskygdur um útlitini hjá føroyska manslandsliðnum eftir frálíka árið undir nýggja venjaratoyminum. 

 - Gamaní tapa vit í dag, men vit skulu ikki fara niður við høvdinum. Vit hava havt eitt fantastiskt landsliðsár, og nógvir hava havt nógva suksé í ár, so at tapa fyri Kroatia á útivølli er, hvat tað er, segði miðverjin.

 - Vit koma sterkt aftur, og vit ætla okkum til eitt EM-endaspæl.

Fyrst er venjingardystur ímóti Kasakstan á skránni, áðrenn næsta árið bíður upp á Nations League-kapping. Hon byrjar ikki fyrrenn í heyst, og tað er spell, tí hugurin hjá venjarum, spælarum og føroyska fólkinum til mandslandsliðsfótbólt er av álvara kyknaður aftur.

Júst tað eiga Eyðun Klakstein, Atli Gregersen og restina av føroyska landsliðstoyminum æruna av, og tey flestu munnu gleða seg til framhaldið.

Rijeka-leikvøllurin (HM-undankapping, 8. umfar)

Kroatia - Føroyar, 1-3 (1-1)
0-1 Géza Dávid Turi, 17. min.
1-1 Josko Gvardiol, 23. min.
2-1 Petar Musa, 57. min.
3-1 Nikola Vlasic, 70 min.