Tveir ukrainskir ráðharrar koyrdir frá

Tveir ukrainskir ráðharrar eru koyrdir frá, skrivar norska kringvarpið. 

Talan er um løgmálaráðharran, German Galusjenko, og orkumálaráðharran, Svitlanu Hryntsjuk. 

Sambært ukrainskum miðlum er Galusjenko undir illgruna fyri umfatandi mutur á orkuøkinum.

Í gjár kannaði NABO, sum er ukrainski stovnurin móti mutri, bústað hansara og høvuðsstøðina hjá Energoatom, sum er eitt alment partafelag, ið rekur kjarnorkuverkini í landinum. 

Galusjenko var orkumálaráðharri, áðrenn hann tók við sum løgmálaráðharri í summar. 

Ukrainski stovnurin móti mutri vil vera við, at 100 mió, dollarar, ella góðar 646 mió danskar krónur, eru hvítvaskaðar hjá almenna partafelagnum, Energoatom.