Russland: Enn er ov tíðliga at tosa um friðaravtalu við Ukraina

Tað er ov tíðliga at tosa um eina friðaravtalu um Ukraina í næstum. 

Tað sigur Dmitrij Peskov, sum er talsmaður í Kreml, við russisku tíðindastovuna Interfax í dag, sambært Reuters-tíðindastovuni.

Útsøgnin kemur eftir at friðarsamráðingar, har bæði amerikanarar og evropearar vóru við saman við ukrainum og russum, byrjaðu í Sveis um vikuskiftið.

Samráðingarfólkini fóru heim at tosa við baklandið, men eru nú aftur farin at samráðast, hesa ferð í Abu Dhabi.

Russum dámdu betur upprunaligu ætlanina

Amerikanski forsetin hevði góðar vónir um at røkka einari friðaravtalu, men russar og ukrainar eru ójavnir á máli um tað. Russar vóru fegnir um upprunaligu ætlanina hjá USA, sum er í 28 punktum, men sambært ukrainum gav hon russum ov nógv og setti órímilig krøv til Ukraina, serliga um landaøki.

Hinvegin hevur Ukraina góðkent endurskoðaðu ætlanina, sum er í 19 punktum.

Og kanska er júst hetta eitt tekin um, at partarnir enn standa langt frá hvørjum øðrum.