Eingin tikin fyri at flúgva við dronu yvir fronskum herskipi

Eingin er tikin fyri at flúgva við dronu við franskt herskip, sum lá í Havn.

Politiið kannaði málið, men tað eydnaðist ikki at eyðmerkja nakran.

Málið er endað, sigur Kári Jacobsen, kanningarleiðari.   

Mánakvøldið 22. septenber fekk politiið fráboðan frá herskipinum um eina dronu. Skipið lá í Havn.

Dronan fleyg yvir skipinum og uttan um tað í 20 minuttir.

Sóu dronuførara við Landssjúkrahúsið

Talan var um lítla dronu.

Umborð hildu tey seg síggja tann, sum var dronuførari, við Landssjúkrahúsið. 

Har stóð eitt fólk í svørtum klæðum.

Ikki er loyvt at brúka dronur við hernaðarútgerð ella herstøð.

Eitt herskip er at meta sum hernaðarútgerð, segði politiið tá.