Maturin hevur alt at siga

- Tað hevur alt at siga, havi eg ásannað, tí tað er jú tað, sum vit eru bygd upp av. 

Soleiðis sigur Alma á Lava úr Havn, tá hon verður spurd, hvønn týdning matur hevur fyri okkum menniskju.

Seinastu 15 árini hevur hon hlidið seg til eina kostætlan, ið nevnist GAPS - Gut and Psychology Syndrome, sum tað eitur á enskum. Kostætlanin inniber millum annað, at mann etur "reinan" mat - matur, sum á ongan hátt er viðgjørdur ella inniheldur tilgjørd evni.

Tað byrjaði afturi í 2011, tá Alma á Lava gjørdi eina roynd at fáa lítla sonin, sum hevði autismu, at blíva betur fyri.

- Eg las á netinum um ein russiskan, kvinnuligan neurolog, sum hevði barn við autismu, og sum hevði góðar royndir við bert at eta ávisan mat. Hetta var GAPS-kostætlanin, og eg vildi vita, um tað kundi gera ein mun hjá soninum, um vit fóru at eta eftir hesi kostætlanini, fortelur Alma á Lava.

Og tað vísti seg, at maturin hevði stóra ávirkan á sonin.

- Hann bleiv í allar mátar betur fyri. Ikki so ofta sjúkur, fekk meira orku og reageraði betur upp á tey námsfrøðiligu tilboðini, sum hann fekk, sigur Alma á Lava.

Sjálv merkti hon eisini ein mun. Umframt at lætna nógv, so merkti hon eisini, at hon fekk tað betri mentalt.

- Eg havi fyrr havt angist og OCD, men hatta er nakað, sum meir ella minni er horvið, síðani vit broyttu matvanar. Og haldi eg meg ikki til kostætlanina, kann eg merkja, at tað byrjar at spøkja aftur, sigur Alma á Lava.

Í morgunsendingini greiðir Alma á Lava frá GAPS-kostætlanini, og hvussu tað hevur ávirkað alla hennara tilveru.