- Tíðindi, mentan og ítróttur
Kanna nýskapan í føroyskum fyritøkum
Kanna nýskapan í føroyskum fyritøkum
Líknandi kanning í 2022 vísti, at føroyskar fyritøkur eru ovarlaga á listanum yvir, hvussu nógv verður nýskapað, og hetta árið brúktu tær meira enn hálva milliard til nýskapan
Byggivinnan brúkti góðar 13 milliónir til nýskapan í 2022, tá seinasta kanningin var gjørd.
Mynd: Hagstovan
11.12.2025 - 09:40
Nú fara Hagstovan og Granskingarráðið aftur at kanna, hvussu nýskapandi føroyskar fyritøkur eru.
Allar fyritøkur við 10 ella fleiri løntakarum í øllum vinnugreinum eru við í kanningini.
Slík kanning var fyrstu ferð gjørd í Føroyum í 2022.
Tá vóru 58 prosent av fyritøkunum nýskapandi.
Ein samanbering av hagtølum fyri 2022 við onnur lond vísir, at føroyskar fyritøkur eru ovarlaga í listanum yvir, hvussu nógv verður nýskapað.
Í Finnlandi nýskaptu 62 prosent, í Noregi 64 prosent, í Føroyum og Svøríki 58 prosent, í Danmark 57 prosent, og 48 prosent av fyritøkum í Íslandi vóru nýskapandi.
Umfatandi hugtak
Hugtakið nýskapan er umfatandi. Fyritøkur kunnu bjóða nýggja vøru ella tænastu, ella menna tær.
Gransking og menning, sum eru gjørdar ella keyptar, vera eisini mettar sum nýskapan.
Kannaðar verða tilgongdir, útreiðslur, fígging, samstarv og arbeiðsgongdir í sambandi við nýskapan.
Føroyskar fyritøkur brúktu 546 milliónir krónur til nýskapan í 2022.
Tað eru serliga tvær vinnugreinar, sum gjørdu stórar íløgur, og áttu 80 prosent av útreiðslunum í 2022.
Tær vinnugreinarnar eru landbúnaður, skógrøkt og fiskiveiða, og kunning og samskifti.
Er kopiera
Nýggjastu sendingar í ÚV
Nýggjastu sendingar í SV
