Konurnar velja aloftast jólatræið

Í útvið 40 ár hava menn frá altjóða felagsskapinum Kiwanis selt jólatrøð í desember.

Øll árini hevur stóra jólatræssølan verið á parkeringsplássinum aftan fyri Sjónleikarhúsið í Havn. Eisini selur felagsskapurin jólatrøð aðrastaðni í landinum.

Ein, sum hevur verið partur av Kiwanis í nógv ár, er Niels Petersen, sum eisini plagar at verið fastur fúsur at selja jólatrøð.

- Hetta er blivin ein siðvenja hjá flestu okkara í desember. Vit gera eitt skema, og so skrivar mann seg á, nær mann stendur í tjaldinum og selur trøð, sigur Niels Petersen, sum upplivir stóra gleði við hesi árligu uppgávuni.

- Hetta er ein felagsskapur, og tað er stuttligt, at tað er ein vinskapur millum limirnar, sum føla, at teir gera ein mun í samfelagnum, sigur Niels Petersen og heldur fram:

- Tað er gleðiligt at síggja fólk koma inn og velja sær eitt træ og fara glað avstað við tí, sigur Niels Petersen.

Í morgunsendingini fortelur Niels Petersen um hesa føstu siðvenjuna hjá Kiwanis í desember, sum hevur útvið 40 ár á baki.