Hákun setti punktum fyri steypasigri á Eliasi og Kiel

Hákun West av Teigum endaði omaná ímóti Eliasi Ellefsen á Skipagøtu, tá Füchse Berlin vann á THW Kiel í fjórðingsfinaluni í týsku steypakappingini.

Tá føroyski vongurin skoraði síðsta málið beint fyri leiklok í Max-Schmeling-Halle stóð 32-30 á máltalvuni, og høvuðsstaðarfelagið skal spæla final four, meðan verjan hjá Kiel, sum vann kjappingina í fjør, má takka fyri seg.

Samandrátturin av dystinum millum tey bæði føroyingafeløgini hevur onki føroyskt mál við. 

Hákun West av Teigum skeyt trý mál upp á fimm royndir, meðan Elias Ellefsen á Skipagøtu skoraði fýra ferðir upp á sjey royndir og legði upp til trý mál í dystinum, har leiðslan skifti hendur fleiri ferðir.

Füchse Berlin skal spæla ímóti Lemgo Lippe á hálvfinaluni 18. apríl, meðan Magdeburg og Bergischer hittast í hinari hálvfinaluni í Lanxess-leikhøllini í Køln.