Elias byrjar inni, um upphitingin gongur væl

Føroysku fyrireikingarnar til EM-endspælið í Oslo fingu eitt skot fyri bógvin, tá Elias Ellefsen á Skipagøtu stutt fyri jól gjørdist skaddur í høgru øksl.

Læknaboðini vóru, at tað fór at taka føroyska spælskiparanum 4 til 6 vikur at koma fyri seg. Síðani hevur tað verið ein bardagi móti tíðini at gerast klárur til fyrsta dystin hjá Føroyum, sum verður móti Sveis í kvøld.

Í upphitingini verður avgerð tikin um, hvussu stóran leiklut Elias Ellefsen á Skipagøtu fær í dystinum móti sveisarum. Gongur upphitingin væl, bendir alt á, at hann fer at skipa føroyska álopsspælið frá byrjan. Leggjast má eisini upp fyri, at Elias Ellefsen á Skipagøtu ikki hevur spælt dyst í ein mánað, og at føroyska landsliðið skal spæla í minsta lagi tríggjar dystir í EM-endaspælinum.

- Tað er ein javnvág, sum skal finnast, sigur Hjalti Mohr Jacobsen, hjálparvenjari.

18 spælarar manna føroyska hópin, sum er við til evropameistaraskapið í manshondbólti.

Til dystirnar eru 16 spælarar við, og í dystinum móti Sveis í kvøld sita Kjartan Johansen og Helgi Hildarson Hoydal uttan fyri dystarhópin, sum Kringvarpið eisini skrivaði í gjár.

Turkiskir kenningar døma dystin

Tað vera Kürşad Erdoğan og İbrahim Özdeniz, sum døma fyrsta EM-dystin hjá føroyingum.

turkiska_domaraparid.jpg

Føroysku royndirnar við turkiska dómaraparinum eru ikki serliga góðar. Teir hava dømt Føroyar eina ferð fyrr, og tað var í seinna HM-undankappingardystinum móti Norðurmakedónia í mai 2024.

Føroyar vunnu 34-26 á heimavølli og taptu 34-26 á útivølli, tá turkiska dómaraparið dømdi dystin.

- Vit hava gjørt spælararnar varugar við, at hesir báðir døma dystin. Teir skulu ikki gerast kløkkir, tá teir renna seg inn í teir í høllini, men annars fyllir tað lítið og einki, sigur Hjalti Mohr Jacobsen.