Stúra fyri at russisk fiskiskip njósnast í norskum sjógvi

Fregnartænastan hjá norska politinum stúrir fyri, at russisk fiskiskip verða brúkt til njósning í norskum sjógvi.

144 russisk skip søktu um loyvi at fiska í norskum sjógvi í ár.

115 teirra hava fingið loyvi, skrivar Fiskeribladet. 29 umsóknir um loyvi eru vrakaðar.

22 teirra vóru frá Norebo ella feløgum, sum Norebo eigur, og sjey frá Murman Seafood.

Norebo hevur stevnt Noregi.

Lisa Erdal, leiðari hjá fregnartænastuni hjá norska politinum, sigur, at tey stúra fyri, at russisku fiskiskipini ikki bara fiska, men eisini njósna.

Herða loðsreglurnar

Reglurnar um loðs vera nú herdar í Noregi.

Skip, sum eru yvir 70 metrar long, hava loðsskyldu. Fiskiskip eru sum oftast styttri enn 70 metrar.

Síðani 2022 sleppa russisk skip bara í tríggjar havnir í Noregi.

Tær eru Kirkenes, Båtsfjord og Tromsø.