Vinstriflokkurin størstur á bláa veingi í fólkatinginum

Nýggj veljarakanning vísir, at var fólkatingval nú, hevði Vinstriflokkurin verið størstur flokkur á bláa veingi í fólkatinginum.

Tað vísir kanning, sum Voxometur hevur gjørt fyri Ritzau. 

Vinstriflokkurin hevur staðið í stað, meðan hinir báðir stjórnarflokkarnir hava havt framgongd í veljarakanningunum. Men nú er vent í holuni. 

Hevði val verið í dag, hevði Vinstriflokkurin fingið 12 prosent av atkvøðunum og  22 fólkaltingssessir, og hevði tryggjað sær plássið sum størsti flokkur á bláa veingi.

Troels Lund Poulsen

Moderatarnir, sum eisini hava havt framgongd, hava hesa vikuna havt afturgongd. Flokkurin hevði fingið fimm prosent av atkvøðunum og níggju sessir, vísir kanningin.

Í síðstu viku stóðu Moderatarnir til at fáa  sjey prosent og 12 sessir. Og fyri fimm vikum síðani lá flokkurin og tøvdi beint oman fyri tinggáttina, sum er tvey prosent.

Flokkurin fekk tá 2,8 prosent.

Sosialdemokratarnir lítla afturgongd

Størsti stjórnarflokkurin, Sosialdemokratarnir, hevur lítla afturgongd og hevði fingið 22,3 prosent av atkvøðunum og 42 sessir.

Tilsamans høvdu stjórnarflokkarnir fingið 71 tinglimir, um val var í hesi vikuni, samanborið við 73 tinglimir í síðstu viku.

Danski fólkaflokkurin hevur eisini framgongd. Flokkurin fær í kanningini hesa vikuna 6,8 prosent av atkvøðunum, sum geva 12 tingsessir.

Politiski viðmerkjarin hjá danska TV2, Noa Reddington, lýsir hýrin á Christiansborg sum elektiskan. 

Noa Reddington

- Fólkatingsval verður útskrivað í hesum mánaðinum, heldur hann:

Voxometer-kanningin var gjørd 2. februar. 1001 útvald fólk, 18 ár og eldri, vóru spurd frá 26. januar til 1. februar.

Óvissan er 2,6 prosentstig hvønn vegin.