Almenn partafeløg í Grønlandi skylda meira enn 12 milliardir

Skuldin í almennu partafeløgunum, sum grønlendska landsstýrið eigur, er nú meira enn 12 milliardir krónur.

Tað verður staðfest í nýggjari frágreiðing, sum landsstýrið, Naalakkersuisut, hevur almannakunngjørt og byggir á roknskapirnar fyri 2024.

Grønlendska landsstýrið eigur 13 partafeløg, harav tey størstu eru Royal Greenland, Greenland Airports, Air Greenland, bústaðarfelagið Illuut, handils- og tænastufyritøkan KNI, flutningsfyritøkan Royal Arctic Line og telefyritøkan Tusass.

Tilsamans starvast fleiri enn 5.300 fólk í fyritøkunum hjá tí almenna í Grønlandi.

Skuldin vaksin mest í Royal Greenland

Tað er serliga í Royal Greenland, at skuldin er økt nógv síðstu árini. Felagið hevur gjørt stórar íløgur, eitt nú í at endurnýggja sín fiskiflota. Sambært frágreiðingini hjá landsstýrinum var rentuberandi skuldin í Royal Greenland nærum 4,7 milliardir krónur í 2024-roknskapinum.

Í Grønlandi eru eisini gjørdar stórar íløgur í floghavnir og flogfør, og tað tyngir almennu partafeløgini. Rentuberandi skuldin í Greenland Airports og Air Greenland nærkast tilsamans fýra milliardum krónum.

Trý av teimum stóru feløgunum, Royal Greenland, KNI og Greenland Airports høvdu tilsamans 543 milliónir krónur í undirskoti í 2024. Onnur feløg høvdu tó yvirskot, og samanlagt var undirskotið í teimum 13 partafeløgunum hjá grønlendska landsstýrinum 86 milliónir krónur í 2024.