Skulu hava sjálvsavgerðarrætt í viðurskiftum, ið viðvíkja Føroyum

Orðið tjóðarsemja verður ikki nevnt í samgonguskjalinum millum Fólkaflokkin, Sambandsflokkin og Javnaðarflokkin, men sagt verður, at Føroyar skulu fáa staðfest sjálvsavgerðarrætt í øllum viðurskiftum, ið viðvíkja Føroyum.

Farið verður at samráðast við donsku stjórnina fyri at fáa limaskap í altjóða samstørvum, herundir at gera ella knýta okkum upp í altjóða avtalur, so sum fríhandils- og tvískattaavtalur.

Flokkarnir siga, at møguleikar fyri limaskapi ella atlimaskapi í EFTA verða kannaðir, og arbeiðið við at gera fríhandilsavtalu við ES og onnur lond, har marknaður er fyri okkara útflutningsvørum, verður styrkt.

Vit skulu framhaldandi vera ein partur av NATO og vesturheiminum. Allar avgerðir á verju- og trygdarøkinum, ið viðvíkja Føroyum, skulu góðkennast av føroyskum myndugleikum. Yvirtøkur verða framdar í semju millum samgonguflokkarnar, verður sagt.

Og nýggja samgongan er samd um at fastfrysta ríkisveitingina, sum í løtuni er 541,8 milliónir kr.